ಎಪ್ಸ್ಟೀನ್ ಪ್ರಕರಣ: ಸಂಪೂರ್ಣ ದಾಖಲೆ ಬಿಡುಗಡೆಗೆ ಒತ್ತಾಯ

ಅಮೆರಿಕದ ನ್ಯಾಯ ಇಲಾಖೆಯ ವಿರುದ್ಧ ಸಂಸದರಿಂದ ಕೋರ್ಟ್‌ಗೆ ಮನವಿ

ವಾಷಿಂಗ್ಟನ್:
ಜೆಫ್ರಿ ಎಪ್ಸ್ಟೀನ್ ಅಮೆರಿಕದ ಅಪಖ್ಯಾತ ಹಣಕಾಸುದಾರನಾಗಿದ್ದು, ಅಪ್ರಾಪ್ತ ವಯಸ್ಸಿನ ಬಾಲಕಿಯರ ಲೈಂಗಿಕ ಶೋಷಣೆ ಮತ್ತು ಲೈಂಗಿಕ ಕಳ್ಳಸಾಗಣೆ ಪ್ರಕರಣಗಳಲ್ಲಿ ಆರೋಪಿಯಾಗಿದ್ದರು. ಶ್ರೀಮಂತರು ಮತ್ತು ರಾಜಕೀಯವಾಗಿ ಪ್ರಭಾವಶಾಲಿ ವ್ಯಕ್ತಿಗಳೊಂದಿಗೆ ಅವರ ಸಂಪರ್ಕದಿಂದ ಈ ಪ್ರಕರಣ ಜಾಗತಿಕ ಗಮನ ಸೆಳೆದಿತ್ತು. 2019ರಲ್ಲಿ ನ್ಯೂಯಾರ್ಕ್ ಜೈಲಿನಲ್ಲಿ ಫೆಡರಲ್ ಲೈಂಗಿಕ ಕಳ್ಳಸಾಗಣೆ ಆರೋಪಗಳ ವಿಚಾರಣೆಗೆ ಕಾಯುತ್ತಿದ್ದಾಗ ಅವರು ಆತ್ಮಹತ್ಯೆ ಮಾಡಿಕೊಂಡ ಸ್ಥಿತಿಯಲ್ಲಿ ಪತ್ತೆಯಾಗಿದ್ದರು. ಈ ಪ್ರಕರಣದಲ್ಲಿ ಅವರ ಸಹಚರಿ ಗಿಸ್ಲೇನ್ ಮ್ಯಾಕ್ಸ್‌ವೆಲ್ 2021ರಲ್ಲಿ ದೋಷಿಯಾಗಿದ್ದು, 20 ವರ್ಷ ಜೈಲು ಶಿಕ್ಷೆ ಅನುಭವಿಸುತ್ತಿದ್ದಾರೆ.

ಈ ಹಿನ್ನೆಲೆಯಲ್ಲೇ, ಜೆಫ್ರಿ ಎಪ್ಸ್ಟೀನ್ ಪ್ರಕರಣಕ್ಕೆ ಸಂಬಂಧಿಸಿದ ಎಲ್ಲಾ ದಾಖಲೆಗಳನ್ನು ಸಾರ್ವಜನಿಕವಾಗಿ ಬಿಡುಗಡೆ ಮಾಡಬೇಕೆಂದು ಒತ್ತಾಯಿಸಿ, ಅಮೆರಿಕದ ಇಬ್ಬರು ಸಂಸದರು ಫೆಡರಲ್ ನ್ಯಾಯಾಲಯದ ಮೆಟ್ಟಿಲೇರಿದ್ದಾರೆ. ಕ್ಯಾಲಿಫೋರ್ನಿಯಾದ ಡೆಮಾಕ್ರಾಟ್ ಸಂಸದ ರೋ ಖನ್ನಾ ಮತ್ತು ಕೆಂಟಕಿಯ ರಿಪಬ್ಲಿಕನ್ ಸಂಸದ ಥಾಮಸ್ ಮ್ಯಾಸಿ, ಎಪ್ಸ್ಟೀನ್ ಫೈಲ್ಸ್ ಟ್ರಾನ್ಸ್‌ಪೆರನ್ಸಿ ಆ್ಯಕ್ಟ್ ಪ್ರಕಾರ ಸಂಪೂರ್ಣ ದಾಖಲೆಗಳನ್ನು ಬಹಿರಂಗಪಡಿಸಲು ಅಮೆರಿಕದ ನ್ಯಾಯ ಇಲಾಖೆ (Department of Justice) ಯನ್ನು ಬಾಧ್ಯಗೊಳಿಸುವಂತೆ ಮನವಿ ಮಾಡಿದ್ದಾರೆ. ದಾಖಲೆ ಬಿಡುಗಡೆ ಪ್ರಕ್ರಿಯೆ ಪಾರದರ್ಶಕವಾಗಿರಲೆಂದು ವಿಶೇಷ ಮೇಲ್ವಿಚಾರಕ (Special Master) ನೇಮಕ ಮಾಡುವಂತೆ ಅವರು ನ್ಯಾಯಾಲಯವನ್ನು ಕೇಳಿದ್ದಾರೆ.

ನಿಗದಿತ ಗಡುವಿನೊಳಗೆ ಎಲ್ಲಾ ದಾಖಲೆಗಳನ್ನು ಬಿಡುಗಡೆ ಮಾಡದಿರುವುದು ಕಾನೂನು ಉಲ್ಲಂಘನೆಯಾಗಿದ್ದು, ಇದರಿಂದ ಬಲಿಪಶುಗಳಿಗೆ ತೀವ್ರ ಮಾನಸಿಕ ಆಘಾತ ಉಂಟಾಗಿದೆ ಎಂದು ಸಂಸದರು ಆರೋಪಿಸಿದ್ದಾರೆ. ನ್ಯಾಯ ಇಲಾಖೆ ಇದುವರೆಗೆ ಒಟ್ಟು ದಾಖಲೆಗಳ 1% ಕ್ಕಿಂತಲೂ ಕಡಿಮೆ ಪ್ರಮಾಣವನ್ನು ಮಾತ್ರ ಬಿಡುಗಡೆ ಮಾಡಿದ್ದು, ಇನ್ನೂ ಲಕ್ಷಾಂತರ ದಾಖಲೆಗಳು ಪರಿಶೀಲನೆಯಲ್ಲಿವೆ ಎಂದು ತಿಳಿಸಿದೆ. ಆದರೆ ಈ ವಿಳಂಬ ಮತ್ತು ವ್ಯಾಪಕ ರೆಡಾಕ್ಷನ್‌ಗಳು ಪಾರದರ್ಶಕತೆ ಬಗ್ಗೆ ಗಂಭೀರ ಪ್ರಶ್ನೆಗಳನ್ನು ಎಬ್ಬಿಸಿವೆ.

ನ್ಯಾಯ ಇಲಾಖೆ ತನ್ನ ಸ್ಪಷ್ಟನೆಯಲ್ಲಿ, ಬಲಿಪಶುಗಳ ಗೌಪ್ಯತೆ ರಕ್ಷಿಸುವ ಉದ್ದೇಶದಿಂದ ದಾಖಲೆಗಳನ್ನು ಪರಿಶೀಲಿಸಲಾಗುತ್ತಿದೆ ಎಂದು ಹೇಳಿದೆ. ಇದೀಗ, ಸಂಪೂರ್ಣ ಸತ್ಯ ಹೊರಬರುವುದೇ ಅಥವಾ ನ್ಯಾಯಾಲಯದ ಹಸ್ತಕ್ಷೇಪ ನಡೆಯುವುದೇ ಎಂಬುದರತ್ತ ಸಾರ್ವಜನಿಕರ ಗಮನ ಕೇಂದ್ರೀಕೃತವಾಗಿದೆ.